Moi ao noso pesar e debido a distintas circunstancias, tivo que pasar practicamente unha década enteira dende a publicación do número 13 de Gamma, tras o que se rachou cunha xeira que levara á edición de trece volumes da revista en catorce anos. De cara ao IX Congreso de AGAPEMA, celebrado en febreiro do 2024, formouse un grupo de traballo renovado coa misión de retomar a revista e sacar adiante un novo número, o 14.

Seguindo a liña iniciada no número 13 continuamos agora tan só en formato electrónico. En consonancia cos tempos que corren, as facilidades que ofrece o soporte dixital decantaron a decisión: dende as menores necesidades económicas ata as oportunidades que supón no tocante ao labor de edición, maquetación e distribución. Sospeitamos que a edición electrónica chegou para quedarse.

Calquera persoa que consulte o número 13 de Gamma comprobará que este 14 non trae cambios na estrutura. No apartado Colaboracións figuran os artigos propios dunha revista de investigación e divulgación, é un bloque aberto para que calquera que se anime escriba sobre innovación, actividades de aula, investigación, recursos que empregades, etc. Por outra banda, as Seccións son fixas e permiten dotar á revista dunha liña común. O bloque de Actividades existe para dar visibilidade ao traballo que profesorado e alumnado realiza dentro da asociación.

No número 14 renovouse o aspecto visual, deseñando novos elementos gráficos como é o logo da revista. Nel realízase un xogo tipográfico acoplando o símbolo “gamma” no propio termo, enlazando deste xeito as súas grafías. Por outra banda, a maquetación engloba ese novo deseño, relacionando coas cores da portada, o logo e as propias seccións; formando así un conxunto compacto e característico en cada número.